Ж.ЭНХБАЯР, М.БАДАМСҮРЭН НАР САЙДЫН АЛБАН ТУШААЛДАА ТОМИЛОГДОЖ, АЖЛАА ХҮЛЭЭН АВЛАА

• Nov 26, 2025

       МАН-ын XXXI Их хурлаар Эдийн засаг, хөгжлийн сайд Н.Учрал МАН-ын даргаар сонгогдож улмаар УИХ-ын дарга болсонтой холбоотойгоор Г.Занданшатарын тэргүүлж буй Засгийн газрын гишүүдийн бүрэлдэхүүнд тодорхой өөрчлөлт оруулах шаардлагатай болсон билээ.

       Тиймээс УИХ-ын чуулганы/2025.11.25/ нэгдсэн хуралдаанд Ерөнхий сайд Г.Занданшатар Ж.Энхбаярыг Тэргүүн шадар сайд бөгөөд Эдийн засаг, хөгжлийн сайдаар, М.Бадамсүрэнг Хүнс хөдөө аж ахуй, хөнгөн үйлдвэрийн сайдаар томилсон тухай захирамжаа танилцууллаа. УИХ-ын гишүүдэд сайдад нэр дэвшигчдээс асуулт асууу, хариулт авсаны дараа дээрх сайд нар тангараг өргөлөө.

       Чуулганы үеэр гишүүдийн зүгээс сайдад нэр дэвшигч М.Бадамсүрэнгээс асуусан асуултуудын дотор ХХААХҮЯ-ыг Улаанбаатар руу нүүлгэх үү? “Шинэ хоршоо” хөдөлгөөний бодлогыг хэрхэн хэрэгжүүлэх вэ гэсэн хоёр асуултыг илүү сонирхсон юм. М.Бадамсүрэн “Томилогдсоныхоо дараа нөхцөл байдалтай танилцана. Ажилтан албан хаагчидтай уулзалт зохион байгуулна. Тэдний байр орон сууц, нийгмийн асуудал хэрхэн шийдэгдсэн, хот хооронд явж ажил амжуулахад ямар хүндрэл бэрхшээл тулгардаг зэрэг асуудлыг судална. Ер нь төрийн бодогын залгамж чанар үргэлжилэх нь зөв. Шинэ хоршоо хөдөлгөөнийг цаашид илүү дундын хоршоо чиглэлд нь хөгжүүлэх бодлого барина” хэмээн байр сууриа илэрхийллээ.

        Мөн өдрийн орой Тэргүүн шадар сайд бөгөөд Эдийн засаг, хөгжлийн сайд Ж.Энхбаяр ХХААХҮ-ийн сайдаар томилогдсон М.Бадамсүрэнд ажлаа хүлээлгэн өглөө.

ХХААХҮ-ийн сайд М.Бадамсүрэн ажилласан байдлын хувьд ШУТИС-ийг газрын тосны инженерээр, Удирдлагын академийг төрийн захиргааны менежментээр тус тус төгсчээ.

Тэрээр,  

2001-2002 онд

Дорнод аймаг дахь Нефть хангамжийн газрын түгээгч, эрхлэгч

2007-2009 онд

Магнай трейд ХХК-ийн салбарын дарга

2009-2012 онд

Дорнод аймгийн Монгол Ардын Намын хорооны дэд дарга

2012 оноос

Дорнод аймгийн Монгол Ардын Намын хорооны дарга

2014-2015 онд

Дорнод аймгийн Засаг даргын орлогч

2015-2024 онд

Дорнод аймгийн Засаг дарга

2024 оноос

Монгол Улсын Их Хурлын гишүүн